بمناسبة عيد الجيش، نشرت خطيبة الملازم أول حسن فرحات، الذي استشهد خلال تعرض بعض المراكز العسكرية التابعة للجيش وقوى الأمن الداخلي في منطقة طرابلس إلى إطلاق نار، فيديو يحاكي آلامها ومعاناتها في رحيله.
وعلّقت على الفيديو بكلمات مؤثرة: 1 آب 2018.. هيديك السّنة متل اليوم كانت الدّني مش سايعتني.. عملتلّك مفاجأة إحتفلّك فيها بعيد الجيش، بعيدك يا عمري.. كان همّي الأوّل والوحيد إزرع الضحكة على وجّك يا حسن..
1 آب 2019.. الدّني كتير كبيرة عليّي.. منّي قادرة عليها وعلى بشاعتها.. قاعدة وحدي عم بنبش صور وفيديوهات السّنة الماضية وإبكي!!
بعيد الجيش يا حسن بدّي قلّك شهامتك ونخوتك وشجاعتك بطرابلس كل لبنان صار يعرف فيها يا عمري..
إنتَ اللي قلت لعسكريّتك خلّيكن ورايي ممنوع حدا منكن يتأذّى!!!
يا تقبرني يا عمري يا حسن شو ملاك.. فديت حالَك كرمال رفقاتك، واحترق قلبي لأنّك بطل..
إنتَ يا ملاكي اللي بيلبقلك شعار "شرف تضحية وفاء"، إنتَ المثال لكل عسكري وضابط بهالبلد، إنتَ فخرنا يا حسن..
تقبرني شو بحبّك يا حسن وشو بعشقك
بين النّفس والنّفس بشتقلك وبفكّر فيك
شو بدّي قلّك أكتر من إنّه كل ثانية بدعي الله يجمعني فيك قريباً لأنّه اشتياقي إلَك ما بقى ينقاس ولا ينوصف!!!.
الله يرحمَك يا بطلي، يا جيشي، يا كلّني".